人名用漢字

人名用漢字（日文：人名用漢字／じんめいようかんじ）是第二次世界大戰後首，日本戶籍裏向好登記成小人个名頭个漢字，弗包括常用漢字个漢字，是法務省户籍法施行規則別表第二（人名用漢字別表）裏向指定个，到2017年攏總有得863個字。加起常用漢字，難有2999個漢字是人名裏向好用个。

搭中國大陸戶籍裏向名字基本丄弗好用繁體字（實際執行个情況可能有點弗同）兩樣，日本人名用漢字收仔一眼舊字體；反過來，中國大陸名字好用生僻字咾，根據日本个戶籍法施行規則个規定，日本人名用个漢字板要是「常用平易」个文字，就是常用漢字、人名用漢字、平假名、片假名（變體假名弗算）、長音搭仔疊字符號。

歷史

二戰結束以後个一段辰光，有人指出老法个日語表記方法忒繁難，爲仔減輕學漢字个負擔，要盡可能限制甚至廢脫漢字个使用，簡化日語。伊歇勒垃國語審議會委員裏向也有得交關箇種日語改革派个人，渠拉對戰後个語言政策影響老大个，像制定當用漢字啥個。

因爲箇能个背景，「人名用漢字」作為國語政策个一部分，勒垃國語審議會裏向討論過。1951年5月份，根據「人名漢字搭界个建議」（人名漢字に関する建議）个內閣告示頒佈。第個政策背後个理念是：

「小人个名頭，應該盡可能用常用咾簡易个文字。蓋咾，小人个名頭用个漢字以《當用漢字表》爲準頂理想。」

— 國語審議会 人名漢字搭界个建議　昭和26年5月14日

還有：

「爲仔提高國民讀寫个能力、促進教育个發展，板要改進國語表記法。具體來講，漢字个整理咾使用規範是必要个方向。（省略）阿拉審議會確信勒垃研究人名表記个辰光，也要拿箇點擺垃心丄向。（省略）講到底，小人个名頭用常用咾簡便个字，是爲小人个將來著想，箇點道理社會丄向大家全懂个。要曉得，照牢《當用漢字》个規矩來，再是真个爲小人好。」

— 国語審議会　人名漢字搭界个声明書　昭和26年5月14日

1976年7月30号开始，人名用漢字进行增加，拿已经加进《常用漢字表》个字删脱。到2004年9月27号，容許字体以外个205隻舊字體、異體字也追加进去哉。

讀法

日本雖然限制人名漢字个使用，必过並呒没限制伊个读法。近腔，人名个读法越来越多式多样咯希诧百怪，交关家長先確定讀法再去寻對應个漢字（實際丄向是借字），比方讲讀作「どれみ（Do re mi）」，写成功「一二三」，導致读出脱人名个情况经常性發生，成為桩社會問題。箇現象日本人叫伊「Kira kira name」。

外部链接

• 人名用漢字の範囲の見直し（拡大）に関する意見募集档案，存勒互联网档案馆当中。（2018年11月29号）
• 法令データ提供システム（總務省 行政管理局）
• 戶籍法施行規則、別表第二　人名用漢字別表　（第六十条関係）（昭和二十二年十二月二十九日司法省令第九十四号）
• 戸籍法施行規則、附則別表　人名用漢字許容字体表　（附則第二項関係）（昭和五六年一〇月一日法務省令第五一号）
• 人名用漢字の一覧（日文维基词典）
• 人名用漢字一覧