後林完全小學

後林完小（二禮小學）舊址，2023年拍

後林完全小學，簡稱後林完小，是老底子浙江湖州个一隻小學，頂頭丄是戴季陶拉自家祖籍創辦个私立戴氏二禮小學。位置拉介歇浙江省湖州市吳興區八里店鎮塘紅村。

歷史

中國國民黨元老戴季陶生拉四川，但是渠祖籍拉湖州戴山。1930年，戴季陶委託湖州人姚源榮（戴季陶拉外甥）拉戴山後林造隻學堂。學堂1931年造好，同一年八月份開學，箇辰光叫私立戴氏二禮小學。。也有講法是戴季陶搭後林小學轉交畀吳興縣政府之後，地方丄搭校名改成二禮來紀念戴季陶。學堂是西式兩層樓，三進，裏向還有圖書館。1933年之後，學堂呌縣立二禮小學；1937年到1939年因爲打仗停學；1939年到1949年，改名戰時二禮小學；1949年之後到肅反之前，改名二禮中心小學。

後末來重開戴山鄉後林完全小學，簡稱後林完小。因爲本來个屋頂是小青瓦搭椽子結構，麻鳥交關，當地人有意見咾，1959年到1961年，先後兩次搭小青瓦調成平瓦（洋瓦），因爲質量弗好，漏水蠻結棍，校舍受着損失。文革个辰光，公社以破四舊立四新搭房屋漏作爲由頭，打拆建報告，1970年開始拆造，新造个房子質量推板得肆，文革以來基本丄每年全勒許維修。也有講法是戴山公社个造反派頭頭搭學堂拆脫來个屋梁搭柱腳擔去造公社辦公大樓。

因爲之前造个房子質量太推板，1986年第二次拆建。2005年8月份，學校合併到戴山學校，元來个校舍畀村民佔用。