中超明星赛

中超明星赛，貤叫中超南北明星对抗赛，是中国足球协会举办个表演性质个比赛，勒垃中超联赛後头进行，比赛收入捐畀宋庆龄基金会。2006年举办头一届，按照地理位置拿中超俱乐部分成北方明星队搭仔南方明星队，中国足协规定两支明星队球员人数各有18人，每支俱乐部至少有一人入选。主教练侪是南北方俱乐部里向成绩顶好个人，第二名个去做伊个助理教练，明星队球员是所在区个明星队主教练评选出来，再根据选票多少、两位主教练意见确定参赛名单，必过只推行两届。2007年，取消每支明星队限定3名外援个规定。

2008年开始改制。中国足协为咾增加明星赛个人气看点，拿中超南北明星对抗赛改成功中超冠军队VS中超明星队。中超明星队是通过官方网络票选、俱乐部推荐、联赛委员会审核个方式确定阿末个参赛队员，人数初步定为18人。中超冠军队个成员是冠军队自家安排个。2013年，赛事取消哉。2014年个辰光曾恢復过，必过比赛搬进大学里向，职业球员多数侪弗去，後些来再也呒买办过。