中国娃娃（照片）

1937年8月28号，礼拜六，上海南火车站个废墟里向一個哭个小囡个照片。

《中国娃娃》（A Chinese baby amid the wreckage）是抗日战争辰光个一张战地摄影作品，1937年勒垃美国《生活杂志》丄公开个。摄影师是美籍华裔战地记者王小亭，勒垃淞沪会战、也就是1937年8月28号个上海南火车站。箇张照片拍个是一個满身是血个小囡坐勒上海南站个铁轨丄，吓得唻哭个弗停，边浪火车站已经畀日本人炸唻荒废脱个情况。箇张照片一般性看成是第二次世界大战个标志性照片之一。2003年，箇照片入选《生活杂志》主持评选个《改变世界个100张照片》。

背景

日本人勒垃赢仔张华浜战斗么，还要对上海进行战略轰炸，轰炸个目标是张华浜港区、上海南火车站箇种非租界地区。

拍摄过程

王小亭拍个另外一张照片，1937年12月份发表勒美国《观察》杂志上

担架丄正勒垃接受急救个小囡

8月28号上半天，日军出动百多架次个轰炸机对上海进行战略性轰炸，当中，日军飞机十二架次轰炸机执行任务个辰光轰炸南火车站（日军後些来扯谎讲是炸错脱哉），当场炸死700人。

箇趟轰炸个辰光，勒垃美国赫斯特新闻社做生活个新闻记者王小亭勒垃办公地点做生活，附近就是南火车站。根据王小亭自家个描述，《中国娃娃》作品是伊逃个辰光拍个。另外，根据相关16mm纪录片记载，轰炸个辰光，中国一位救难个人越过废墟抱起個重伤个小囡，摆勒铁轨边浪向，立时三刻回转去救其他人，箇個小囡就是王小亭《中国娃娃》照片里向个小囡。

箇卷赫斯特新闻社底片经王小亭冲洗仔么，通过美国军舰从上海送到菲律宾马尼拉，再通过泛美航空飞机运到美国纽约，交畀美国生活杂志，成为箇隻周刊当期个封面。箇张照片扭转美国对于中国抗日战争个观点，也让箇周刊全世界热销。据生活杂志估计，当期有得1.36亿人看过迭张照片。

后续

日本对箇种事体当然是矢口否认，弗停寻借口硬争，一歇扯谎讲是炸错脱，一歇讲伊摆拍，还悬赏15万美金追杀王小亭。