东茭泾公园

公园个湖

东茭泾公园，貤叫东茭泾绿地，是上海市静安区彭浦新村街道一座小型公园。北面马路对过个彭浦四季公园原先是东茭泾绿地个二期工程，必过造好以后独立命名成另外一隻公园哉。

公园勒垃东茭泾东岸，原先是临汾路高压线走廊个公共绿地。1990年代末，箇块绿化畀人占用脱做苗圃，后来进一步成为棚户区搭仔家禽养殖棚屋，环境脏乱。2015年底，原闸北区撤销脱以后，静安区花仔十几天拿违建拆脱种绿化，箇就是东茭泾绿地。公园2016年底建成开放，总面积1.15万平米，里向有得香樟、银杏、樱花、桂花等廿几种植物，中部运用“海绵城市”理念，设置小型人工湖搭“雨水花园”来调蓄雨水。公园里向有塑胶跑道等健身设施，好进行休闲运动。