上海联城足球俱乐部

上海联城足球俱乐部，老底子一家垃拉中国上海个职业足球俱乐部，活勒个辰光是中国足球超级联赛个球队，主场设勒上海浦东新区源深体育中心体育场。

联城俱乐部个前身是2000年成立个大连足球特区俱乐部，先后改名叫大连赛德隆、珠海安平、珠海中邦、上海中邦，2006年畀第九城市个总裁朱骏收购，改名上海联城。

2007年2月8号，上海申花、上海联城两家中超俱乐部一道召開記者会，宣布朱骏花大价钿收购上海申花，兩支足球俱乐部合併組成新球隊。新俱乐部个注册名叫上海申花联盛足球俱乐部，简称上海申花，联城消失，原俱乐部解散脱，放弃参加2007年联赛。

俱乐部历史

2000年2月1号，大连足球特区俱乐部正式成立，参加乙级联赛。

2001年1月10号，俱乐部正式改名大连赛德隆足球俱乐部，当年升上甲B联赛。2002年畀珠海安平足球俱乐部收购，改名珠海安平队。2002年甲B联赛里向，“升班马”勒垃徐弘个率领下头获得亚军。因为中国足协为咾让国家队全力冲击2002年韩日世界杯，取消当年个甲B联赛升降级，大连赛德隆错过升级到甲A联赛个机会。2004年，珠海安平更名叫珠海中邦足球俱乐部，打进中超。

2005年末，上海联城个前身上海中邦足球俱乐部因为后台出资方退出中国职业足球联赛，伊个辰光个第九城市总裁朱骏便拿中邦队买下来，让自家拥有一支中国足球顶级联赛个球队，乘枪势里拿自家个上海九城足球俱乐部卖脱，通过摘牌方式从原球队引进祁宏、姜坤、殷锡福、荣宇、姚幼明五名球员，必过姚幼明並呒没完成转会。

朱骏收购球队以后，勒垃2006年个中国足球超级联赛开赛前，俱乐部连续买仔几名国青队成员，勒垃媒体面前炒作自家。同时，联城俱乐部畀非一线球员只开出1500块个月薪，差距大唻引来弗少非议。

2006年中国足球超级联赛前几轮，上海联城队勒垃巴西主教练卡洛斯个率领下头成绩蛮好，必过赛季中期开始豁边哉，一度要保级，阿末只拿着第7名。

2007年初，联城俱乐部帮上海申花俱乐部合并，申请注销俱乐部个中超资格，上海联城俱乐部正式从中国足坛消失。

涉嫌行贿

2012年4月25号，前足管中心主任谢亚龙勒垃辽宁丹东中院接受法庭审理，承认上海联城足球俱乐部个所有人朱骏勒垃2006年向伊行贿，目的是获得裁判员勒垃执法方面个支持。

俱乐部名字变更

俱乐部解散前“联城”个名称，是从伊拥有人朱骏勒垃甲级联赛球队上海九城足球俱乐部联城足球队来个。2005年4月份，九城俱乐部正式拿球队名字改成联城，表示出箇球队帮朱骏自家个网络产业第九城市个区别。勒垃接下来收购上海中邦个过程当中，拿联城箇隻名字带到新俱乐部。

卫平帮朱骏交叉投资个两支球队

卫平个中邦集团帮朱骏个第九城市侪曾投资过两支相同个球队。一支是珠海中邦足球俱乐部（前身大连赛德隆足球俱乐部），搬到上海以后叫上海中邦足球俱乐部，畀当时上海九城足球俱乐部个老板朱骏收购，中邦集团保留10％股份，享有2006赛季冠名球队个权利，改名为上海联城足球俱乐部联城中邦队。申花联城合并以后，中邦集团曾淡出足球界一段辰光。另外一支是原先个上海九城足球俱乐部（前身上海天娜足球俱乐部），畀朱骏卖脱以后，几经转手，到仔中邦集团手里向，先搬去无锡後回到上海，改名上海中邦足球俱乐部浦东中邦队。

年度	球队	级别	球队	级别
2000年	上海青浦梅花		大连足球特区	乙级
2001年			大连赛德隆	乙级
2002年	上海天娜	丙级		甲B
2003年		乙级	珠海安平	甲B
2004年	上海九城	乙级	珠海中邦	甲级
2005年		甲级	上海中邦	中超
2006年	上海康博群英	甲级	上海联城中邦	中超
2007年	上海七斗星	甲级	合并解散
2008年	无锡中邦	甲级	-
2009年	上海浦东中邦	甲级
2010年	上海浦东中邦	甲级
2011年	资产转让

卫平拥有

朱骏拥有

外部链接

• 大连赛德隆今日正式宣布：3600万转让给珠海安平-新浪体育-2003/1/14
• 升超后中邦主场回归上海 为留中邦珠海球迷喝倒彩-《足球》报-2004/10/25

参见

• 上海申花
• 上海九城