正广和

正广和是中国现在活勒个顶早个饮料牌子，1864年英国商人勒垃上海创立个，1892年开始生产汽水；1954年变成上海市国有企业，是20世纪上中叶中国顶大个汽水厂，乃朝是光明食品集团个饮用水、汽水牌子，是头批“中华老字号”企业。

历史

外资主导辰光

正广和汽水厂勒垃1930年《申報》丄个廣告

老底子正广和汽水瓶

1864年，英國商人史密斯勒垃上海英租界创立广和洋行，主要經營洋酒、汽水。同是英國商人考尔伯克、麦克利格兩個人勒垃1882年加盟洋行，必过史密斯弗久就停脱合作，另外去开仔爿老广和洋行；故咾广和洋行也改名正广和洋行，表示区别，话箇意思是“正本清源、广泛流通、和颜悦色”。二家头1892年勒垃上海虹口提篮桥附近造正广和汽水厂（伊辰光叫泌乐水厂），1921年（也有话是1923年个）拿工厂搬去韬朋路（今通北路400號），乃朝是上海市第一批登记不可移动文物。

正广和汽水厂勒垃1920年代末採用改进式三重蒸馏装置，是伊辰光上海顶复杂、顶完善个饮料机器。汽水厂努力宣傳，刊登廣告，还是上海头爿用馬車送飲料个飲料公司，首創汽車送貨。正广和汽水厂是英國商人开办个，故咾勒垃上海租界有得交关特权，比方讲生产经销权、卫生监督检查豁免、商标保护咾啥个；还有英国勒垃中国个银行做资金後盾。

1930年，正广和汽水厂成为中國顶大个汽水厂，卖到中國国内、其他远东地区、英国、澳大利亚。1930年代中期，正广和汽水厂勒垃中國沿海地区已經相当有名气。抗日戰爭前，正广和汽水厂幾乎完全控制中國个汽水销售，大家叫伊“汽水大王”。

抗日戰爭个辰光，正广和汽水厂畀日本佔脱，生產汽水、桔子水畀日軍吃，後首来交畀投靠日本人个中國人，阿末停產。抗戰胜利仔么，汽水厂重新回到英國商人手里向，必过厂房損壞嚴重，生意做弗了哉；正广和原本个企業高管也畀日本人厾进集中营，一分铜钿也呒每哉，没能力恢复汽水厂个生产。箇辰光，洋行买办方安圃联络华商李耀文组成富华公司，搭正广和汽水厂建立合作关系，約定厂房咾啥个不动产是英商个，其他开支是富华公司出钞票。故咾，1946年5月份，正广和汽水厂复工生产，富华公司做经销商。同年7月份，麥克利格个儿子想靠箇汽水厂空手套白狼，喊标价30万英磅想拿汽水厂卖脱，逼咾富华公司让步；故咾，英商勒垃1946年8月份到1948年一分洋钿也呒没初，却得到汽水厂所有利润。

国有时代

第二次國共內戰里向，正广和汽水厂里向驻扎有國民革命軍个隻团部，後首来因为中国人民解放军打进上海逃脱了，厂也没哪能破坏。1954年7月份，上海市地方工业局代管正广和汽水厂，改名正广和汽水公司。1956年，正广和汽水厂搭仔多爿小食品厂合并。文化大革命開始仔么，有評論批評“正广和”箇名字是外国人起个，故咾勒垃1966年改名上海汽水厂。1978年，否定部分文化大革命思想个中國共產黨第十一屆中央委員會第三次全體會議召開仔么，汽水厂恢復“正广和”商標，但是直到1992年（也有讲1997年个）才恢復正广和汽水厂箇名字。

改革開放一开始，上海汽水厂相当出名。1980年代，汽水厂引进英國、德國、美國个生产设备，有得六条汽水生产线。1980年代後期，市场竞争激烈，正广和𢴳弗住哉，市场占有率、经济效益巴拉巴拉往下头落，。1990年代初，外國饮料品牌進入中國市場，正广和节节败退；可口可乐甚至还申请过用正广和个英文商标「AQUARIUS」。正广和後来专门生產飲用水，成立上海正广和饮用水有限公司。1998年6月12号，正广和拿自家订水网络演变来个上海正广和网上销售有限公司成，是国内传统工业企业里向头一家用网络销售个。2000年12月31号，上海正广和饮用水有限公司同法国达能集团合作成立合资公司，到2011年拗断。2012年成為梅林正广和股份隻业务板块。