上海市静安区协和双语培明学校

上海市静安区协和双语培明学校

上海市静安区协和双语培明学校勒垃中華人民共和國上海市靜安區新闸路1607号，是座公办个初级中学，占地16亩，建筑面积14281平方米。

历史

1925年，许君衡勒垃麦根路（恒丰路桥望东）创办私立培明女子学校。1929年开始，学堂搬脱多埭，直到1936年，学堂搬到新闸路1607号个南园。1936年8月份，胡乔木、罗叔章、雍文涛咾啥个到培明女中用教师身份發展中國共產黨党员，建立培明女中中共地下党支部。1937年淞沪會戰爆发，培明女中临时搬去南阳路上课。同年10月份，中國共產黨創辦上海学生救亡协会，勒垃培明女中里向发展成員。1940年3月30号，学堂秘书主任吴某希望学堂好勒垃汪伪政权个教育局高头办理登记，学堂个中共党支部通过学生会印发《告全校同学家长书》，学生会主席庄珍佩畀校长递交要求拿吴某赶了跑个请愿书，阿末学堂没去办理登记。1945年抗日战争結束仔么，培明女中搬回到南园。1947年五二〇运动发生仔么，培明女中个中共党组织勒垃学堂里向敲学生仔个边鼓，叫伊拉罢课，勒垃路邊发放反中國國民黨个传单。1956年，学堂从私立学校改成公立培明女中，成为一所完全中学。1969年8月改名上海市培明中学，男个女个侪收。

2022年，上海浦东新区协和教育中心托管箇学堂，改名上海市静安区协和双语培明学校，也变成一所初级中学。一般性认为伊是“协和双语学校”系列校区个一部分。