上海市航空运动学校

上海市航空运动学校，老底子叫上海市航空俱乐部，是跳伞、滑翔运动训练机构，上海市飞机跳伞队训练基地。1958年，上海市航空俱乐部勒垃宝山丁家桥机场成立，开仔业余滑翔训练班。1962年，市飞机跳伞队合并到市航空俱乐部里向。文化大革命开始么就停业哉，1975年开始逐步恢复工作，拿名字改脱。1979年，为咾造宝山钢铁总厂，搬去龙华机场，滑翔训练借用浙江长兴机场。1980年，滑翔学校撤销。1982年，造仔1825×81（米）个跑道、1000×400（米）个滑翔机降落草坪等设施。1985年以后，举办全国跳伞锦标赛、全国飞机跳伞分区锦标赛咾啥个比赛。1992年，学校占地39600平方米（合59.4亩），里向操场占地12000平方米，有1幢教学楼，2座机库，用个器材多数是五六十年代国家体委调拨个军用设备。1993年，飞机跳伞市队解散。2019年，上海市航空运动学校整建制合并进上海市军事体育俱乐部里向。