上海国际汽车城

上海国际汽车城，貤叫“安亭汽车城”，是造勒中华人民共和国上海市嘉定区安亭镇个汽车产业中心，是轿车工业、轿车生产配套工业为主个现代化综合性工业区。

历史

2000年6月份，时任中共中央政治局委员、上海市委书记黄菊提出来勒安亭造现代化汽车工业区个方案，当年10月份时任上海市常务副市长陈良宇批复肯定嘉定区箇隻建设意见。2001年2月份，上海市政府正式拿伊写进上海重点发展项目里向，同年9月28号，项目建设全面展开。

产业布局

位于上海国际汽车城内的国家汽车零部件出口基地

汽车城规划总面积68平方公里，主要依托利用上海国家中心城市个地位，吸引国内外汽车厂家进来，核心产业是汽车研发制造，同步推进轿车、二手车等多种车型外加汽车零部件个贸易还有自动驾驶个试点。另一方面，利用长三角区位优势，发展现代汽车服务业。

主体功能

上汽大众工厂

上海国际汽车城主体功能是汽车个制造、研发、贸易。制造区规划面积14平方公里，上汽大众占地6平方公里、零部件配套区占地8平方公里；贸易研发区规划7.43平方公里。制造领域包括整车制造搭仔关键零部件制造，研发领域主要有上汽集团汽车工程研究院、国家机动车产品质量监督检验中心等多家国内外研究机构组成，负责新型技术、环保动力汽车个研发搭仔创新。贸易区占地约4.8平方公里，主要负责汽车相关贸易，比方讲新车市场、二手车市场、贸易展示街、汽车城大厦、博览馆、会展中心、主题公园咾啥个。

配套产业

帮汽车生产个核心环节相配套，区域里向有弗少体验、教育、比赛等汽车主题文化附属产业设施，比方讲上汽大众试车场、同济大学嘉定校区、上海国际赛车场咾啥个。同济大学嘉定校区是重要个汽车产业人才培训基地，占地面积1500亩，建筑面积约40万平方米，总投资20亿元；上海国际赛车场占地5.3平方公里，赛车场看台好塞进去20万人看比赛，从2004年开始连续举办F1赛车大奖赛中国站个比赛。2012年5月份，占地186亩，预算总投资约15亿元个上海国际汽车城研发科技港动工。

汽车创新港

上海国际汽车城科技创新港是一隻汽车研發基地，2015年10月26号开园，由上海市经信委颁授牌“上海新型工业化（智能网联汽车）产业示范基地”，占地面积12万平方米，建筑面积20万平方米。

经济效益

因为汽车产业，2013年，安亭镇经济发展势头迅速，完成规模以上工业产值73亿元，同比增长20.9%；完成税收28.3亿元，同比增长91.21%。必过並弗是所有项目侪由经济丄个成功，比方讲上海国际赛车场，启用以来亏损好几年哉，发现承办赛事根本赚弗出啥钞票。。

外部链接

• 上海国际汽车城官方网站 档案，存勒互联网档案馆当中。（2023年12月9号）