三江口是宁波城市个发源地，历史好到唐朝[1]。历史丄，三江口是宁波千把年来个城市中心，是宁波海上航运、海上丝绸之路个起点，也是近代西方文化较早影响宁波个地方，到现在还是宁波行政、商业中心，分布有得交关历史遗迹[2]。根据2011年发布个三江口核心区规划，宁波三江口核心区范围东界到曙光路，西到解放路-大庆南路，南面到百丈路-大沙泥街，北到惊驾路，规划用地350公顷[3]。
三江口勒垃海曙区、鄞州区、江北区三区交汇个地方，名字里向3条江分别是姚江、奉化江搭仔两条河合并出来个甬江。姚江是甬江干流，源头是四明山夏家岭，经过浙东运河仔么好一路到钱塘江南岸，是宁波历史丄重要个航道。奉化江是甬江最大支流，同样源头勒垃四明山。三江口勒垃宁波平原中部，地势平坦，是第四纪堆积平原。[4]
宁波三江口全景照片，2016年2月10号拍个，照片里向左面是奉化江，正当中是姚江，右手边是甬江。
三江口个历史好看到西汉。东晋个辰光，为咾防范孙恩起义军，刘牢之勒垃三江口造筱墙，故咾现在还有得筱墙巷箇地名[5]。738年（开元廿六年），设立明州，一开始治所勒垃小溪（今海曙区鄞江镇伊面）。821年(长庆元年)，明州刺史韩察拿明州州治搬去三江口，造内城，宁波建城，宁波城市中心也确立勒三江口𡍲。898年(乾宁五年)，宁波罗城（外城）也造起来哉。到民国拆城墙前，宁波老城范围基本没变过。宁波三江丄顶早个浮桥——灵桥是唐朝个辰光造个，是沟通奉化江两岸个主要通道。宁波港口一开始也勒垃三江口西岸，老城东渡门外头，是海上丝绸之路隻起点[1]。1844年，宁波开埠，江北岸形成外国人居留地，是宁波近代化个起点、宁波帮个发祥地，有得交关历史建筑比方讲石库门[6]。中华民国成立仔么，拆脱老城墙，铺环城、城内马路[7]。改革开放仔么，三江口修仔现代建筑，马路拓宽多埭，弗少老建筑也拆脱哉，区域风貌变化大[8]。
宁波城市中心长期勒垃三江口，故咾三江口有得交关各辰光个文物古迹，比方讲唐朝到现在个历史建筑，近代西方文明影响底下个西式建筑、宁波商人个房子、会所咾啥个。
天封塔是武周天册万岁、万岁登封年间个建筑，比宁波建城早126年，长期是宁波个地标建筑[9]。鼓楼也叫海曙楼，是唐朝宁波造子城辰光个南城门，唐长庆元年修个，是宁波现在少有个古城楼遗址[10]。咸通塔是浙江省唯一个唐朝砖塔[11]。永丰库遗址是中国大陆头一趟发现个古代大型仓库遗址[12]。天一阁明朝个，现在有得藏书三十万卷，是亚洲现存顶早个藏书楼[13]。庆安会馆是江南现在唯一有得天后宫、会馆功能个古建筑群，清咸丰三年造个，是北号船商谈事体个户荡。咸丰四年十一月，船商勒垃庆安会馆做出买西洋轮船个决定，中国人自办个头一艘轮船[14]。江北岸近代建筑群是宁波开埠到现在勒垃江北岸码头个一系列近代建筑个统称，有得1861年造个浙海关总税务司办公楼，1876年造个江北岸天主教堂，1927年造个宁波邮政局咾啥个近现代建筑，反映出近代西方文化对宁波个影响[15]。
 鼓楼搭仔永丰库遗址 | 鼓楼搭仔永丰库遗址 |
 天封塔 | 天封塔 |
 咸通塔 | 咸通塔 |
 庆安会馆 | 庆安会馆 |
 江北岸天主教堂夜景 | 江北岸天主教堂夜景 |
 宁波邮政局旧址 | 宁波邮政局旧址 |
|
宁波天一广场
三江口长期是宁波个商业中心。太平天国辰光，长江航运停脱，南北通商改走海路，宁波成为南北货物个集散地，三江口亦成为宁波顶闹猛个地方，有得“走遍天下，不如宁波江厦”个讲法[16]。宁波中山路有过状元楼、源康布行、四明药房等宁波老字号[8]，江厦街一带也曾遍布鱼店、钱庄、裁缝店、南北货店[17]。
现在，三江口还是宁波重要个商业中心。中山东路有“浙东商业第一街”个讲法。1988年，宁波头一爿现代化大型商场华联商厦开勒三江口，後些来勒垃开明街口到江厦桥东弗足一千米个路段里向有得10家大型商场，营业总面积近20万平方米[18]。2002年10月份造好个天一广场大家叫伊“甬城客厅”，2007年前十大商户销售总额有得30亿元，交关国际知名品牌勒垃里向开店，宁波市六区八成个家电销量也是箇地方成交个[19]。2009年开业个和义大道是宁波奢侈品销售门户，开业一年销售额毛8亿元[20]。2010年造好个宁波书城伊辰光还是华东顶大个书店[21]。
宁波顶早个柏油路是1927年修个从鼓楼到中山公园个公园路。1933年，原城墙扒脱仔么，墙基丄修个环城马路修好哉。三江口个路网勒垃三隻区里向侪弗一样，海曙区是网状个，鄞州区是方格式个，江北区是倒三角个[22]。现在，三江口主要个东西向马路有通途路、中山路、药行街-柳汀街咾啥个，南北向个有解放路、人民路-江厦街-灵桥路、江东北路-江东南路咾啥个。
宁波三江丄顶早个现代桥梁是灵桥，德国西门子洋行修个，1936年5月份修好个，是宁波重要地标[23]。到2011年底，宁波三江丄有得18座桥，当中勒垃规划个三江六岸滨江休闲带里向个有得15座，当中，姚江丄个桥主要是梁式桥，奉化江浪个主要是拱桥，甬江丄个主要是斜拉桥[24]。
宁波轨道交通1号线、2号线通过三江口，勒垃鼓楼站形成换乘，也有得7号线经过，交关多车站用勒商业开发丄[25][26]。
宁波滨江休闲带规划示意图
2011年，宁波市政府通过《三江六岸滨江休闲带概念规划》，名字叫“发现宁波”，拿三江口打造成有宁波城市特色个地标。规划里向，通过呒没机动车个滨江空间，拿老城、老外滩、江东新开发区域串起来，再通过地铁搭仔环线公交发展中心城区慢行公交，畀走路、踏脚踏车个人提供通畅个滨水通道[27]。箇规划有得三大系统：三江口一小时步行圈系统，三江六岸滨江休闲带系统、“十里水乡”水上游览系统。三江口一小时步行圈系统规划造新个步行桥、过街通道，形成天一广场-奉化江步行桥-江东核心区-庆安会馆-杉杉公园-宁波书城-外滩大桥-江北外滩-江北公园-开明桥-和义大道-钱业会馆个步行带[28]。三江六岸滨江休闲带系统沿咾江设计个，全长36公里，是连续个走路、脚踏车通道，改造、新造沿线个公园绿地，提升开放空间、雕塑、灯光[29]。“十里水乡”水上游览系统主要利用箇3条河浜开设水上巴士，沿岸摆餐饮娱乐设施[30]。因为三江口对宁波城市个意义大，规划方案一出，立时三刻全宁波勒垃讨论箇规划[31]。
.jpg)
