万里街道

万里街道，是中国上海市普陀区下头一隻街道办事处，本来是长征镇个一部分，2014年11月24号从长征镇里向拆出来个，街道辖区面积3.3平方公里，街道办事处勒垃真金路459号。

历史

万里地区老底子是嘉定县个，清朝个辰光因为成立宝山县，划畀宝山县真如乡。民国17年（1928年）7月7号，万里地区帮真如乡一道划畀上海特别市，真如乡改建成真如区。民国28年（1939年），真如区撤销，万里地区划畀沪北区。民国34年（1945年），恢复真如区，万里地区再划畀真如区。1956年3月份，撤销真如区，万里地区进仔西郊区。1958年，西郊区撤销，万里地区划畀嘉定县，是长征人民公社管个。1983年6月份，政社分设，万里地区分属长征乡个万里、长征、横港三隻村。1984年11月份，长征乡万里地区个长征村从嘉定县划畀普陀区。1992年7月15号，长征乡万里地区个万里、横港两村从嘉定县划畀普陀区，侪属于普陀区长征乡。1993年12月20号，长征乡撤乡建镇，万里地区属长征镇。

2014年11月24号，上海市人民政府批复同意万里地区从长征镇析出，设立万里街道，行政区域范围是：东到岚皋路，南到交通路，西到桃浦西路、真南路，北面是宝山区大场镇，街道办事处一开始勒垃富平路518号。2015年1月6号，普陀区举行万里街道揭牌成立大会。2015年3月20号，万里街道办事处正式挂牌成立。2015年10月23号，上海市人民政府批复同意万里街道办事处驻地搬到乃朝箇隻真金路459号。