上海新铁链筛网制造有限公司

上海新铁链筛网制造有限公司，简称新铁链公司，是上海市一爿混合所有制纺织企业，从老底子上海筛网厂改制得唻个。

历史

成立

上海筛网厂前身是1949年9月份个辰光，李志和、陈汉德、李旭旦三人合伙成立个一声绸厂，厂勒垃许昌路同乐坊41号，只有4台织机、8名员工，生产XX9型面粉筛网，是中国第一代国产面粉筛网，必过做工弗灵，卖嘞弗好。1950年12月份，张东青、李志和、陈汉德三人再投资人民币旧币1.5亿，买仔台摇纡车、1台牵经车，改进工艺，重新试产，新品叫CB39型，客户个评价蛮好个。1951年1月份，工厂改名“礼安筛绢罗底制造厂”，改用铁链牌商标。3月份，箇隻厂拿CB39型带得去东德莱比锡个工业展览会，获奖，外加轻工业部提出“优先使用国产筛绢”，故咾是供勿应求。9月21号，工厂搬到裕德路98弄77号。1952年，拓展出XX6-12、GGl8-72等弗同规格型号个筛网，也因为朝鲜战争需要，生产过军用规格个产品。

国营

1954年4月份，工厂实行公私合营，9月份，又拿几爿其他工厂吃脱，改名“礼安丝织厂”，厂也搬到西康路1501弄1号，做出来个产品转畀上海五金采购供应站卖。1956年试制树脂涂层工艺蚕丝筛网，必过成本忒高，呒办法生产；1959年，做出铜丝筛网，交通运输、国防工业丄好用。1960年，厂里向拿乔其绒车间改造成筛网车间。1961年试制锦纶筛网，必过碰着静电问题，质量推板。1968年10月份改名“上海筛网厂”，搬到长寿路23号原丽新织造厂地块。1970年，原上海绢纺织厂军品设备搬进来。1974年，锦纶筛网改成锦纶、蚕丝混合筛网，静电少脱交关，效果好交关。

改革开放仔么，上海筛网厂老个设备侪淘汰脱，买仔新式织机174台，1979年产值2435万元，是建厂以来最高纪录。1980年又买仔西德个热风定型机1台。必过1980年代乡办企业兴起仔么，筛网厂销售能力比弗过伊拉，卖出去个越来越少。1983年入选“七五”科技攻关项目高目筛网，又从瑞士进口10台片梭织机、1台整经机，1984年8月份做出来JM9、JM12两种规格高目锦纶筛网，1986年10月份获得国家专利。

改制

1995年，长寿路桥拓宽，筛网厂原长寿路厂址动迁。厂长杨骏炜决定顺带便拿工厂改组，引入200万民营资本、100万职工持股，铜筛网车间还成立中日合资公司，通过拿上棉一厂、二十八厂部分设备买下来，完成设备更新换代。1997年8月份，工厂正式搬到嘉定区江桥镇华江公路157号现在箇地方。2002年12月份，注册成立“上海新铁链筛网制造有限公司”，上海丝绸集团出1240万（国营40%）、上海金发实业有限公司出1240万（民营40%）、企业职工出620万（20%）。改组以後，厂里向研发出K59225、K59321特种降落伞绸，是神舟五号、六号、七号返回舱用个，乃朝是上海市高新技术企业。

其他相关

上海筛网厂原长寿路23号地块工厂搬脱仔么做别个用场，2017年造北横通道个辰光征收箇块地，新铁链公司故咾获得2.2亿元个补偿款。勒垃箇块地里向，造字隻盾构接收井，叫伊“筛网厂工作井”。

外部链接

• 上海新铁链筛网制造有限公司 档案，存勒互联网档案馆当中。（2025年5月25号）