胡安·何塞

Don Juan José de Austria, 1678.

胡安·何塞（西班牙文：Juan José de Austria，1629年4月7号—1679年9月17号），是十七世纪西班牙个有名军事将领搭权臣。伊从血统上讲起来，是西班牙哈布斯堡王朝费利佩四世个私生子。伊个妈妈是有名个演员玛利亚·咖德隆。伊从小受到良好个教育，外交才能结棍，军事技巧高超。是费利佩四世维持西班牙境外领土个重要军事将领。并且帮助国王平息佳泰隆收割者叛乱。先后立在西西里、西属低地、佳泰隆搭葡萄牙出任最高指挥官。弗过，因为西班牙总体国力个下降，伊个军事行动虽然受到一定成效，弗过大部分侪以失败告终。比方讲对西属低地个战争，就最后失败，让荷兰共和国正式独立。立在葡萄牙个干涉，也嘸扭转局面。1665年费利佩四世死脱之后，指定伊帮助先天发育有问题个儿子卡洛斯二世处理国政。个当中，伊搭卡洛斯二世个妈妈发生冲突，拿王太后赶跑。立在1677年实际控制西班牙。之后推行一系列改革，让西班牙个局面略有好转。弗过，1679年，伊得毛病（另外一种讲法是畀敌对势力毒杀）死脱。之后，西班牙个局面又回到继续衰落个道路高头去哉。