卡洛斯四世
卡洛斯四世（西文：Carlos IV，全称：Carlos Antonio Pascual Francisco Javier Juan Nepomuceno José Januario Serafin Diego de Borbón y Saxony，1748年11月11号－1819年1月20号），伊是卡洛斯三世个儿子，1788年接替伊死脱个爸爸，加冕成为西班牙国王，并统治西班牙搭西印度殖民地。伊弗是一个合格个统治者，目光短浅，还欢喜听信谣言。因为伊个一趟趟错误决策，让西班牙国运急转直下，伊自家也立最终畀拿破仑软禁并废脱王位。
生平[编辑]
出生搭早年[编辑]
伊是1748年11月立在伯蒂奇出生个。迭个辰光，伊个爸爸，后势来个卡洛斯三世(西班牙)是两西西里国王。所以，伊小辰光是立在乃朝个意大利长大个。搭波旁家族别个成员一样，伊拥有一个邪气长个全名：Carlos Antonio Pascual Francisco Javier Juan Nepomuceno José Januario Serafín Diego。
立在1759年，伊爸爸继承西班牙王位，所以，伊也就回到西班牙，成为王太子。并且获得阿斯图里亚斯亲王迭个西班牙王太子专用头衔。1788年12月14号，卡洛斯三世驾崩之后，伊继承王位，加冕成为西班牙国王。
初期统治[编辑]
搭伊同辰光交关受到启蒙运动熏陶个人一样，卡洛斯四世即位开始，就搞开明专制，反对教会权威，并且许诺要放开更多个管制。伊个第一个首相是白佛罗里达伯爵。伊也是一个有名个启蒙官僚。弗过，1789年爆发个法国大革命拿迭个步骤侪打乱哉。1789年挨末阶段开始，交关保守派建议卡洛斯四世弗要瞎三话四，重滔路易十六个覆辙。所以，伊就命令加强对言论个管制，对躁动分子严加看管。同时，重新恢复宗教审判局个权威。
阿兰达伯爵政府[编辑]
1790年代初，卡洛斯四世看到法国个风头弗大紧张，就为搞好关系，任命西班牙18世纪顶顶有名个启蒙贵族阿兰达伯爵作为自家个宰相。此人搭法国文人伏尔泰、卢梭等侪是朋友，国王个举动，明显是对法国示好。弗过，当年法国爆发巨变，路易十六出逃失败，国家开始走向共和国。个能，也让卡洛斯四世惊慌失措，赶忙拿阿兰达伯爵撤换，同时参加第一趟反法同盟。
高帝误国[编辑]
1792年，卡洛斯四世宠幸个奸臣蛮虐厄·高帝迅速走红，并立在1793年畀任命为首相，此人本身是卡洛斯四世个保镖。嘸啥真才实干。只晓得夸夸其谈。伊个上台，也让卡洛斯四世个统治更加混乱，对欧洲个辰光个局势把握，也就愈发混沌糊涂。