陈霸先
陈霸先 （吴拼：Jing--Po-Siae【古】Djin--Po-Sian）（503-559）字兴国，小字法生，吴越吴兴郡长城县（今浙江长兴）下若里人，是南北朝辰光南朝陈个开国皇帝，史称陈武帝，志度弘遠，恭儉勤勞。终结衣冠南渡后北方流亡士族把持国家个历史，是南朝唯一个吴越人皇帝。在吴越历史上向具有邪气重要个地位。557年－559年在位。登基之前，渠是南朝梁个名将。
身世[编辑]
陈霸先在梁帝国天监二年在吴兴出生。渠家庭条件弗大灵光，但从小欢喜舞枪弄棒，肌肉结实，在乡里是条好汉。大同年，梁帝国宗室萧暎担当吴兴太守辰光，担渠提拔上来；之后带到岭南交州地面，当亲兵头领。许歇岭南土豪蛮多反抗梁帝国个，陈霸先拉拢本地其余土著势力，胡萝卜配大棒，担渠场一一消灭平定，个能便奠定自家个名声搭威望。萧暎死脱之后，渠接替位置，成为交州司马。大同十一年，彻底平定交州；548年，成为岭南事实意义浪个大军阀。
侯景之乱发生之后，陈霸先准备带病勤王。弗过，待teng1在广州个梁帝国宗室萧勃无心相去讨伐侯景，陈霸先就到湘东王萧绎个江陵幕府效力。之后，陈霸先搭王僧辩在江西会师，一淘攻破侯景，552年，担侯景之乱平定。之后，萧绎称帝，陈霸先在京口驻扎。个辰光渠弗曾有称帝个想法。弗过局面一歇歇就彻底变化。554年，西魏攻破江陵，杀脱梁元帝。之后北齐开始干涉梁帝国朝政，扶持老早被渠场俘虏个萧渊明做北齐个傀儡khwei2 lei2皇帝。陈霸先弗允许，王僧辩倒是赞同。个能一来，陈霸先搭王僧辩决裂，担王击杀，之后北齐大军南侵，陈霸先又担萧勃搭北齐干涉军队全击破，让吴越地区获得安宁。个辰光，梁帝国个王室已经是陈霸先自家个傀儡，渠也就顺水推舟，废脱弗作兴个梁末帝，557年十月称帝，成为陈帝国个开国皇帝。
559年六月，陈霸先因病在建康驾崩，享年五十七岁；侄儿子陈蒨即位。八月，上谥号武皇帝，庙号高祖。同月，在万安陵落葬。
评价[编辑]
- 《陈书》:[倜傥大度，志度弘远，不理家产，明达果断，为当时所推服，][及长，涉猎史籍，好读兵书，明纬候、孤虚、遁甲之术，多武艺。]
- 姚思廉：[高祖智以绥物，武以宁乱，英谋独运，人皆莫及，故能征伐四克，静难夷凶。至升大麓之日，居阿衡之任，恒崇宽政，爱育为本。有须发调军储，皆出于事不可息。加以俭素自率，常膳不过数品，私飨曲宴，皆瓦器蚌盘，肴核庶羞，裁令充足而已，不为虚费。初平侯景，及立绍泰，子女玉帛，皆班将士。其充闱房者，衣不重彩，饰无金翠，哥钟女乐，不列于前。及乎践祚，弥厉恭俭。故隆功茂德，光有天下焉。]
族群[编辑]
陈霸先出生土著寒门家庭，在重视门第个南朝社会，地位是邪气低下。盖咾，渠虽在实际当中一直使用大量土著土豪作为高官，但表面上向又要装点门面，讲自家是何颍川陈氏个后裔。认汉帝国个太丘长陈蹇是祖宗。