冬至

来自 吴语维基百科
蹦到: 导航搜寻

冬至(Winter Solstice),是农历浪个一个交关重要个节气,也是一个传统节日。勒二千五百多年之前个春秋时代,中国就已经用土圭观测太阳,测定出冬至,俚是廿四节气当中最早制订出个一个,辰光勒每年个阳历12月21日到23日之间,搿一日天是北半球全年当中白天最短、夜里最长个一日天。

节气[编辑]

冬至是廿四节气之一,而且是最重要个节气之一。冬至前是大雪(12月7-9日交节),冬至之后是小寒(翌年1月4-6日交节),冬至是12月21日到12月23日交节。据记载,周代以冬十一月为正月,以冬至为岁首过新年。

吴地习俗[编辑]

冬至大如年。苏州人有“冬至大如年”个叫法,所以特别重视搿个节日。传统个姑苏人家,会勒冬至夜吃冬酿酒。节前,亲眷互相送礼,提筐檐盒,谓之冬至盘。节前一夜,俗叫冬至夜,全家团聚吃冬至夜饭。凡是出嫁个囡鱼板调回转夫家,要是留勒娘家,不利亲眷,会穷得“十只饭箩九只空”。南瓜弗可以放勒窝里过夜,板调放勒露天屋面浪,不然要遭灾殃。夜饭前头要祭祖,祭祖个菜板调回锅烧,弗然吃之会记忆力差个。夜饭个菜特别丰盛,有铜钿个人家起码八盆一暖锅,外加侪是鸡、整鸭、大青鱼,还有红焖蹄膀。窝里有外出个人,也会照样放一副筷鞥。各种菜侪有个吉祥个名称。 冬至早浪上起来,吃冬至团子。另外,俗以冬至前后有雨雪,主年夜晴。要是冬至天晴,搿么年末就多雨雪,路浪泥泞。所以有“干净冬至邋遢年,邋遢冬至干净年”个讲法。